O derradeiro martes outorgáronse no Círculo de Belas Artes de Madrid os primeiros Premios Europeos de RSE, enmarcados dentro do foro internacional de CSR Spain 2013, que organizou a asociación de empresas e profesionais da RSE líder no noso país, Forética.

Na apertura do foro participou o presidente de IBM Europa, Harry van Dorenmalen, que destacou que a “responsabilidade social corporativa converteuse nunha das chaves para as compañías, polo que é importante conectala cos seus valores principais”.

O obxectivo destes galardóns é recoñecer os “mellores proxectos de colaboración entre empresas e grupos de interese non empresariais pensados para innovar na xestión da empresa”. O derradeiro fin é recoñecer as boas condutas en canto a RSE que se levan a cabo en Europa, como selo distintivo das actuacións das empresas, que sirvan para que outras organizacións se vexan reflectidas e realicen máis accións de responsabilidade social empresarial.

O premio ao mellor proxecto de “Sostenibilidade ambiental e cambio climático” levouno a empresa Adif co seu proxecto Ferrolinera, unha iniciativa que aproveitou a enerxía do freado dos trens para a recarga de coches eléctricos, deste xeito aumentaron a eficiencia enerxética e aforraron enerxía.

En canto á Iniciativa RSE-PEME do Instituto de Crédito Oficial (ICO), un proxecto conxunto coa Rede Española do Pacto Mundial para promocionar a RSE e a integración desta nas pemes, recibiu o galardón á “Transparencia para lograr confianza”.

O Grupo Norte conseguiu o premio na categoría de “Creación de emprego e empregabilidade” polo seu proxecto Cero vítimas da violencia de xénero, que facilita a integración sociolaboral das mulleres vítimas dándolles estabilidade laboral e independencia económica. A entidade contratou a case 200 mulleres vítimas da violencia de xénero.

Indra e o seu proxecto Consignos foron galardoados pola mellor iniciativa dunha grande empresa por intentar incluír as persoas con discapacidade auditiva a través do uso de tecnoloxías innovadoras. A mellor iniciativa dunha peme conseguiuna a empresa Fruits de Ponent polo proxecto Dosafruit, un sistema para axustar as doses de aplicación dos produtos fisiosanitarios, de xeito que se adecúen aos parámetros da plantación.

O proxecto Unilever Comparte da firma Unilever tamén foi premiado na categoría de “Sociedades integradoras” por darlle prioridade á saúde e ao benestar, o ambiente e a calidade de vida na sociedade e no seu contorno.

En total presentáronse 63 proxectos aos premios, a meirande parte deles, ata un 86%, foron de grandes empresas e tan só un 14% das candidaturas corresponderon a pemes.

O xurado estivo presidido polo Alto Comisionado para a Marca España, Carlos Espinosa, así como por outras persoas con altos cargos no eido empresarial, académico ou na administración pública, como a presidenta da Conferencia de Reitores das Universidades Españolas, Adelaida de la Calle; o presidente da Asociación de Periodistas de Información Económica, Javier García; o presidente de Forética, Iñaki Ereño; ou o presidente da Comisión de RSE da Confederación Española de Organizacións Empresariais, Juan Pablo Lázaro.