Acaba de saír publicado o noveno informe de resultados do Observatorio permanente sobre a aplicación da responsabilidade social empresarial nas empresas galegas que leva a cabo a Xunta de Galicia, a través da Consellería de Traballo e Benestar.

O proxecto do Observatorio de RSE comezou hai catro anos, en maio de 2009, e dende entón, os datos extraídos aseguran que o tamaño empresarial é o factor máis influínte neste coñecemento: en efecto, canto maior é o tamaño dunha empresa máis probable é que esta declare ter un mellor e máis completo coñecemento da RSE.

A opinión xeral de que o desenvolvemento da RSE nas empresas galegas é aínda escaso é maioritaria. Os resultados obtidos son moi similares aos do último informe: case o 73% destas opina que este desenvolvemento é pouco, fronte a un 22% escaso que considera que é bastante. É preciso sinalar que se trata de resultados lixeiramente peores que os de hai seis meses.

De forma similar a anteriores informes, constatouse unha relación directa, positiva e estatisticamente significativa entre o grao de coñecemento propio sobre a RSE e a opinión sobre o desenvolvemento desta nas empresas galegas. En consecuencia, as empresas que manifestan ter un mellor coñecemento sobre a RSE son as que consideraban que o grao de desenvolvemento desta en Galicia é maior.

Nesta novena ondada, un 11,2% das empresas entrevistadas declarou ter participado nalgún curso, seminario ou conferencia relacionada con algún aspecto da RSE. Confírmase un acusado descenso desta clase de participación cuxas causas poden deberse aos importantes axustes que as empresas se están a ver obrigadas a realizar ante o actual contexto de crise económica.

Os sector que maior coñecemento ten da responsabilidade social empresarial é o da industria, seguido da construción. As empresas que menos coñecemento teñen son as dedicadas ao sector primario ou aos servizos.

Os factores ambientais son, outra vez, os que máis preocupan ás empresas da nosa comunidade. De feito, a norma ISO 14001 é a máis común entre as empresas entrevistadas, ata un 97,1% a teñen, e a meirande parte das enquisadas di que ten en conta na súas políticas de xestión as directrices e pautas ambientais. Por detrás destes factores destacan preocupacións como a economía ou o emprego.

A presenza de estándares con vencello directo da RSE aínda é escasa nas empresas galegas. A norma AA1000 tan só se encontra no 1,5% das empresas; as empresas que implantaron a ISO 26000:2010 redúcense a un 0,4%; e tan só unha das empresas enquisadas ten o estándar SG21.

Unha política estendida é o servizo de atención ao cliente e de reclamacións, máis dun 73% das empresas consultadas aseguran telo implantado. En canto aos provedores, non é moi corrente que teñan políticas de priorización ou políticias de apoio e, as que os teñen, tenden a estar ligadas á existencia dun código ético.

Moi poucas empresas galegas contan cun código ético e o seu establecemento depende en gran medida do seu tamaño. Canto máis grandes son as empresas, máis posibilidades teñen de ter este tipo de ferramentas. De aí que a Xunta de Galicia teña a disposición das empresas, especialmente das pemes, e de xeito gratuíto a ferramenta de autodiagnóstico e de xeración de informes Xunta Pro-RSE.

Desde RSE Xunta de Galicia animámosvos a botarlle unha ollada ao resumo dos resultados desta novena ondada do Observatorio permantente sobre a aplicación da RSE nas empresas galegas que podedes atopar na nosa web.